Паричната гаранција која осомничениот Сеад Кочан ја понудил до Кривичниот суд не е доволен доказ дека тој нема да го повтори делото, рекол обвинителот Гаврил Бубевски на денешната расправа по жалбата на СЈО за притворот на Кочан, објави „Алсат“.
Од одбраната на Кочан, пак, тврдат дека паричната гаранција во износ од речиси еден милион евра, која ја доставил Кочан, е легитимна и е пракса на сите демократски држави.
Според адвокатот на Кочан, Никола Додевски, нема причина СЈО да инсистира повторно за притвор, кога осомничениот остава толкава сума како гаранција.
Седницата на Кривичниот совет по жалбата на СЈО траеше околу час и половина.
Судот има рок од 48 часа да се изјасни за жалбата, која што беше поднесена вчера.
Кочан е осомничен во случајот „Труст“ на СЈО и се сомничи дека со фалсификувани документи од ЕЛЕМ добил тендер во вредност од 17 милиони евра.
Ова е втор пат Кривичниот совет на Кривичниот суд да одлучува за притворот на Кочан, откако Врховен суд со решение ги укина одлуките на Кривичните совети на Кривичниот и Апелацискиот суд со кои на Кочан му беше определен притвор од 30 дена. Од денот кога му беше определен притвор Кочан беше во бегство се до почетокот на оваа недела кога во прединфарктна состојба беше донесен во Клиниката за кардиологија.