Специјалното јавно обвинителство има законска обврска да го побара случајот „Сопот“ бидејќи е поврзан со содржината и со кривичните дела што произлегуваат од еден од прислушуваните разговори кој беше јавно објавен, соопштија денеска од СЈО.
„Како што и претходно појаснивме, врз основа на јавно објавен разговор, побаран е предметот познат во јавноста како „Сопот“, а за да се произнесеме за нашата надлежност врз тој предмет. Сакаме да појасниме дека поднесеното обвинение против обвинетите во случајот „Сопот“ е поврзано со содржината и со кривичните дела што произлегуваат од содржината на разговорот кој се однесува на наведениот случај, па со оглед на ваквата околност, ние имаме законска обврска да го побараме овој предмет, а за да се произнесеме за нашата надлежност врз истиот“, стои во соопштението на СЈО.
Од Основното јавно обвинителство за гонење организиран криминал и корупција потврдија дека го добиле барањето од СЈО, но побарале од Советот на јавни обвинители да се произнесе околу тоа дали предметот треба да му биде даден на СЈО.
Информација дали е прифатено барањето на СЈО нема, но претседателот на Советот, Петар Аневски, минатата недела рече дека случајот „Сопот“ е стар 13 години и дека Јанева не е надлежна за настани кои се случиле пред 2008 година.
Од СЈО на ова велат дека периодот од 2008 до 2015 година наведен во Законот за Специјалното јавно обвинителство се однесува исклучиво на времето кога било вршено незаконското следење на комуникации, но не и на кривичните дела што произлегуваат од нив.