На денешното рочиште за случајот „Сопот“, Специјалното јавно обвинителство за доказ предложи снимка од разговор меѓу Гордана Јанкуловска и Сашо Мијалков поврзана со случајот. Според специјалниот обвинител Бурим Рустеми оваа снимка ќе придонесе да се утврди вистината за случајот
Во листата на нови докази, кои СЈО ги предложи, е и невропсихијатриско вештачење на клучниот сведок. Психијатрите Ставре Гравов и Александар Марцикиќ треба да дадат наод за тоа како настанот влијаел на сведокот.
СЈО предложи како сведоци во судница да се појават и шестмина вработени во УБК кои по настанот работеле на предистражната постапка на овој случај и кои имаат сознанија за истата.
Шесте обвинети останаа на изјавите кои порано ги дале пред судот. Четворица обвинети се недостапни, а еден е починат.
Одбраната на обвинетите во изјава за медиумите најави дека од судот ќе побара во судница како сведоци да бидат повикани Јанкуловска и Мијалков бидејќи, според нив, нивното сведочење е клучно за да се дознае вистината за случајот Сопот.
И клучниот сведок во случајот Сопот Рамадан Бајрами утрово јавно проговори за физичкото и психичко малтретирање со кои бил изнуден неговиот исказ врз кој се темелеше првостепената пресуда.
-Бев малтретиран и мачен и психички и физички и на секаков друг начин. Лицата на оние кои ме сослушуваа нема никогаш да им ги заборавам. Кога се случи случајот јас воопшто не бев присутен во Македонија. Имам печат на пасошот. Докажано е дека не сум бил во Македонија, рече тој.
Наредното рочиште е закажано за 23 ноември кога судот треба да одлучи дали ќе ги прифати доказите на СЈО меѓу кои и снимката од прислушуваниот разговор меѓу Мијалков и Јанкуловска.
За случајот „Сопот” кумановскиот суд осуди 11 лица за тероризам на вкупно 150 години затвор за поставената мина на патот Сушево – Сопот кога на 4 март 2003 година загинаа двајца полски војници на НАТО и еден цивил. Но, поради недоследности во исказите на клучниот сведок, постапката почна одново во Основниот суд Скопје 1.