Специјалното јавно обвинителство се откажало од барањето за замрзнување на седиштето на ВМРО-ДПМНЕ, објави ТВ 24.
Според информациите на оваа телевизија, СЈО минатата недела со поднесок до Врховниот суд го повлекло барањето за заштита на законитоста со кое бараа Врховен да ја преиспита основаноста на одлуките на Кривичниот суд со кои беше одбиено барањето на Катица Јанева за замрзнување на имотот на ВМРО-ДПМНЕ, меѓу кои и главното седиште на партијата.
Имајќи го предвид барањето на СЈО за повлекување, Врховниот суд донел одлука со која се отфрла првичното барање за замрзнување на имотот на опозициската ВМРО ДПМНЕ, а одлуката е објавена на сајтот на судот.
Барањето за замрзнување на имотот на ВМРО ДПМНЕ беше дел од истрагата за случајот „Талир“ за незаконското финансирање на партијата која СЈО не успеа да ја затвори, но најави дека и покрај тоа што истекол рокот за поднесување на обвиненија, истрагата за како ВМРО ДПМНЕ стекнала толкав имот ќе продолжи и понатаму.
Истрагата за предметот „Талир“ беше отворена во мај против 11 лица, меѓу кои и екс премиерот Груевски. Постои основано сомнение дека и покрај тоа што на првоосомничениот како претседател на политичката партија му биле добро познати законските ограничувања, мотивиран исклучиво од лична природа и за зацврстување на неговата политичка моќ и позиција во партијата и во државата и за обезбедување на целосна контрола над политичката партија го прекршил Законот.