Шпанската полиција почна истрага за фудбалски натпревар кој е под сомнение дека е наместен. Поради тоа е уапсен Филипо Вито ди Пјеро, тренер на третолигашот Елденсе.

Тимот на Елденсе во изминатиот викенд загуби од Барселона Б со 12:0, а приведувањето на Ди Пјеро дојде по жалбите на поедини фудбалери кај претседателот на клубот за нерегуларности. Тој, пак, негира секаква злоупотреба.

Елденсе во неделата ги стави „под мраз“ сите активности, а ја прекина соработката и со група на италијански инвеститори со кои неодамна потпиша договор за партнерство.

Барселона Б, пак, со триумфот од 12:0 го израмни рекордот во шпанската трета лига. Со идентичен резултат заврши и средбата меѓу Екстрамадура и Портуенсе во 1993 година.

Фудбалерот Шеик Саад за шпанските медиуми изјави дека четворица негови соиграчи се вклучени во нерегуларности. Меѓу нив и оние кои крајот на мечот го дочекале во солзи без притоа да ги именува. Тој откри дека резултатот бил договорен да биде 8:0 на полувреме и 12:0 на крај.

„На крајот сè ќе биде откриено“, рече Саад и додаде дека одбил да игра.

Претседателот Давид Агилар истакна дека од менаџер на еден од фудбалерите дознал за местење на мечот во договор со интернет обложување. Притоа изнесе забелешки за необични одлуки на италијанскиот тренер меѓу кои и користење на играчи кои дотогаш не биле стандардни.