Нејзините дела исто така се одраз на нејзиниот болен однос со сопственото тело, инвалидитетот заради прележаната детска парализа и сериозните повреди по претрпената автобуска несреќа.

Еден од последните автопортрети на мексиканската сликарка Фрида Кало насловен „Диего и јас“ ( Diego y Yo) е продаден на аукција на „Сотеби“ во Њујорк за рекордни 34,9 милиони долари.

Ова е досега највисока цена платена за уметничко дело на латиноамерикански автор.

Рекордот претходно беше поставен од Диего Ривера со кого Кало со децении имала страствена врска. Негова слика е продадена за 9,76 милиони долари во 2018 година.

Автопортретот на Кало е приказ на расплаканата сликарка со сопругот Риверо насликан над нејзините очи.

Аукциската куќа „Сотеби“ на 16 ноември оваа слика ја опиша како едно од најважните дела на Фрида Кало кое се појавило на аукција.

Како што наведува “Њујорк тајмс“, купувачот на делото е идентификуван како Едуардо Ф. Косантини, основач на музејот во Аргентина.

Оваа слика последен пат била продадена на аукција во 1990 година за 1,4 милиони долари.

Кало, која се смета за една од најголемите сликари на 20 век, била позната по своите интимни автопортрети кои изразуваат болка и изолација.

Таа живеела од 1907 до 1954 година и со својата уметност гордо ја промовирала автентичната мексиканска култура.

Нејзините дела исто така се одраз на нејзиниот болен однос со сопственото тело, инвалидитетот заради прележаната детска парализа и сериозните повреди по претрпената автобуска несреќа.
(А.В)