Исмаил Морина поднесе жалба на одлуката на судот во Дубровник за екстрадиција во Србија, но поднесе и барање за политички азил во Хрватска. Ова го потврди неговиот адвокат Дарко Бутиган бидејќи, како што вели, „неговиот клиент стравува дека би имал фер судење во Белград“. Српските власти распишаа меѓународна потерница за 35 годишниот Албанец од Кукс кој се сомничи дека го управувал дронот што предизвика на фудбалскиот натпревар меѓу репрезентациите на Србија и на Албанија, во октомври во 2014 година, во квалификациите за ЕП 2016.

„Република Србија бара испорака на Исмаил Морина според членот 317 став 3 од Кривичниот законик за казнено дело предизвикување на национална, верска и расна омраза и нетрпеливост. Низ целата постапка тврдиме дека предметното знаме што слета на стадионот не содржи никакви елементи на што повикуваат на нацинонална, расна или било каква друга омраза меѓу народите“, изјави Бутиган за радио „Слободна Европа“.

На предметното знаме, појаснува Бутиган, има фотографии на двајца татковци на албанската нација, Иса Болетини и Исмаил Ќемали, кои на конференцијата во Лондон во 1913 година барале Албанија да биде во границите прикажани меѓу нивните ликови на платното прикачено на дронот.

„Тоа е се што тоа знаме говори. По мечот немаше ескалации на насилства меѓу Албанците и Србите ниту пак беше потикната било каква расна или национална омраза меѓу народите. Одговорност за инцидентот што се случи паѓа на полицијата и организаторот на натпреварот. Нивни е пропустот што навивачите влегоа на терен каде не им е место“, додава правниот застапник од Дубровник за радион „Слободна Европа“.

И додека за случајот „дрон“ во Хрватска се говори исклучиво во правосудни категории, медиуми во регионот, покрај одбраната, му даваат политичка конотација. Весникот „Бота Сот“ од Приштина објави дека Морина нема да биде испорачан на Србија „благодарение на големиот пријател на Албанците, поранешниот хрватски претседател Стипе Месиќ“.

„Морина дефинитивно нема да биде предаден на Србија. Заслуга за тоа имаат нашите пријатели и познаници во Хрватска“, напиша Наим Мурсел под фотографијата на Месиќ и Беџет Пацоли, лидер на Алијансата за ново Косово, што ја објави на социјалните мрежи.

Вучиќ: Не преговараме за извршители на кривични дела

Реакција по последните случувања во врска со Исмаил Морина дојде и од српскиот премиер Александар Вучиќ кој нагласи дека нема преговори за извршители на кривични дела.

„Ние нашата работа ја завршивме и чекаме одлука. Во врска со ова нема што да разговараме ниту да преговараме со некој“, порача Вучиќ.

Морина во јуни беше уапсен од хрватската полиција во Дубровник по распишана потерница од Србија. Тамошниот суд донесе првостепено решение за екстрадиција на албанскиот државјанин. Неговиот, пак, правен застапник поднесе жалба пред Врховниот суд на Хрватска чија одлука се очекува во Белград.