Горан Станковски (40) е назначен за нов тренер на Работнички. Поранешниот македонски интернационалец и репрезентативец, кој досега работеше со младите категории во клубот од Градски парк, доаѓа на местото на Виктор Треневски кој по слабиот вовед во сезоната одлучи да се повлече од кормилото. „Црвените“ се осми на табелата по шест одиграни меча со биланс од една победа, две реми и три порази и гол разлика 9:13, а ги очекува и дуелот со Вардар што беше одложен поради обврските на шампионот во квалификациите за Лига Европа.
„Покрај одличната кариера како фудбалер, Станковски го потврди својот професионален капацитет и како тренер предводејќи ја својата категорија на играчи до титула во првенството и во Купот на Македонија. Затоа и одлучивме да добие доверба и во првата екипа со надеж за подобри резултати во продолжение на сезоната“, истакна Драган Поповски, претседател на Работнички.
Асистентите во стручниот штаб остануваат како и досега. Десна рака на Станкoвски ќе бидат Милан Илиевски, Славчо Георгиевски и Драги Атанасовски како тренер на голманите. Дебито на новиот кормилар на Работнички ќе биде во среда (27 септември) со дуел против Силекс на „Телеком арена“.
Станковски дел од кариерата ја мина во дресот на Работнички, а во домашната сцена играше и за Слога Југомагнат, за Македонија Ѓорче Петров и за Шкупи. Интернационалната ја започна во Тенис Борусија (Германија) по што следуваа трансфери во Антверпен (Белгија), во Кичи (Хонг Конг), во Сибир Новосибирск (Русија), во Дијарбакир (Турција) и во Дачија Кишињев (Молдавија).