Блиндираниот мерцедес набавен во 2012 година за 600.000 евра и заради кој Специјалното јавно обвинителство го отвори случајот „Тенк“ се наоѓа во Владата и, како што велат од Министерството за внатрешни работи (МВР), се користи како „главно возило за високи гости на странски делегации“, објави „Мета“.

„Блиндираниот мерцедес се користи како главно возило за високи гости-странски делегации при нивна посета на Република Македонија, а кои се обезбедуваат со прв, втор и трет степен безбедносни мерки (претседатели на држави, премиери на влади, заменици-претседатели, заменици-претседатели на влади и други) – велат од МВР за агенцијата.

Од МВР велат дека „мерцедесот“ често се користи и „во случаи кога поради амортизираност и застареност на блиндираните возила со кои се превезуваат претседателот на државата, претседателот на Собранието и премиерот“ не можат да одговорат на безбедносните стандарди и Уредбата за обезбедување на личности и објекти.

Ова значи дека со мерцедесот се возат и Ѓорге Иванов, Трајко Вељаноски и Емил Димитриев, ако нивното обезбедување процени дека така треба.