Ѓонул Бајрактар ги презема овластувањата и одговорностите во раководењето со Министерството за труд и социјална политика (МТСП). Ова доаѓа како заклучок на десеттата седница на техничката Влада на која е констатирано дека се создадени услови од член 48, став 2 од Законот за организација и работа на органите на државната управа.
Во делот 4 на став 2 од член 48 во посочениот Закон се уредува раководењето со органите на државната управа и нивни меѓусебни односи и во него се вели дека „заменикот го заменува министерот во случај кога тој е отсутен или кога поради болест и други причини не е во можност да ја врши својата функција, со сите негови овластувања и одговорности во раководењето“.
Бајрактар стапува на должност во МТСП, откако ВМРО-ДПМНЕ не предложи нов кадар како замена за Рашела Мизрахи која беше разрешена во македонското Собрание по предлог на техничкиот премиер Оливер Спасовски. Како образложение на барањето наведе дека „министерката неколкупати се појави на прес-конференција во МТСП пред табла со името „Република Македонија“ со што, според него, „го прекршила Уставот со тоа непочитување на Преспанскиот договор и на тој начин ги загрозила евроинтеграциите“.
На владината седница беше усвоена и одлуката за одобрување на средства од Буџетот на Република Северна Македонија во износ од 5.277.000 милиони денари на Агенцијата за аудио и аудиовизуелни медиумски услуги, за следење на изборните активности во 2020 година.
Разгледана и усвоена е информацијата за спроведување на еколошката мерка за субвенционирање на граѓаните со високоефикасни инвертер клима уреди за потребите на домаќинствата во општините Битола, Кичево, Тетово и Скопје, а кои користат енергетски неефикасни уреди за греење во нивните домаќинства што влијаат на зголемување на концентрацијата на РМ10 и РМ2.5 честички.