Грчкото фудбалско првенство е ставено под мраз на неодредено време. Одлуката за мирување на „бубамарата“ ја донесе Владата на јужниот сосед по консултациите на премиерот Алексис Ципрас со заменик министерот за спорт, Јоргос Василијадис и доаѓа како последица скандалозниот потег на газдата на ПАОК, Иван Савидис кој со пиштол на појас влезе во терен за време на мечот со АЕК во Солун и сакаше да се пресмета со судиите.
„Одлучивме да го прекинеме шампионатот. Нема да продолжи ако не постои јасна рамка со нови услови и правила“, е изјавата на Василијадис што ја пренесува агенцијата „Ројтерс“.
Владата на Грција и фудбалскиот сојуз се постојано во контакт со Европската фудбалска асоцијација (УЕФА) и моментно нема простор за загрозување на правилото за мешање на политиката во спортот.
Ова е втора одлука за запирање на грчкото фудбалско првенство во последните неколку години. Овојпат судијата Јоргос Коминис беше принуден да го прекине дербито во Солун по влегувањето на Савидис во терен кој притоа беше видно незадоволен од поништениот гол на ПАОК. Поради тоа, грчката полиција издаде налог за апсење на првиот човек на „црно-белите“ и за уште четири лица од неговото обезбедување.