Серена Вилијамс го освои првиот гренслем турнир оваа сезона. Во финалето на Австралија опен за своја противничка ја имаше постарата сестра Венус.
Нешто помалку од час и половина игра ѝ беше потребно на Серена Вилијамс да стигне до својата седма титула на австралиско тло, а резултатот на крај беше 2:0 во сетови.
Серена двата сета го доби со резултат 6:4, но првиот беше посебно интересен бидејќи ниту една од тенисерките не успеа да освои гем на својот сервис во првите четири одиграни гемови.
Серена во ланското финале изгуби од германската тенисерка Анџелика Кербер, но сега ја враќа титулата во својата витрина.
Со победата на Австралија опен, Серена ја надмина Штефи Граф (22 титули) , но засега се уште е недостижна Маргарет Корт (24 титули) и се враќа на првата позиција на ВТА листата.
Заедно, сестрите имаат освоено 30 титули во поединечна конкуренција на гренслемите, плус 14 во женски двојки и две во мешани двојки и се доминантни жени во тенисот речиси две декади.