Собранието денеска преку соопштение ја потврди информацијата дека лидерот на опозицијата на 30 јуни поднел известување дека сака да се откаже од правото на имунитет. Тој барањето го поднел до Комисијата за деловнички и мандатно имунитетни прашања во Собранието.
Од Собранието велат дека оваа комисија не е надлежна за тоа прашање.
„Во врска со известувањето од страна на пратеникот Никола Груевски за откажување од правото на имунитет, доставено до Комисијата за деловнички и мандатно-имунитетни прашања на Собранието на Република Македонија, на 30 јуни, ве известуваме дека Комисијата не е надлежна да постапува по ова известување. Согласно член 53 од Деловникот на Собранието на Република Македонија, појаснуваат од таму, Комисијата постапува по барање за одобрување притвор, кое надлежниот орган, односно судот, го доставува до претседателот на Собранието на Република Македонија, по што барањето се доставува до Комисијата“, соопштија од Кабинетот на претседателот на Собранието.
Известувањето на Груевски за откажување од имунитетот следува по обвиненијата што ги поднесе Специјалното јавно обвинителство. Лидерот на ВМРО-ДПМНЕ е директно осомничен во „Титаник“ (за изборни измами), „ТНТ“ (за уривањето на „Космос“), „Тенк“ (за набавка на „мерцедес“) и „Траекторија“ (за изградба на автопат).
Се уште нема информација каква одлука донеле Кривичните совети на Кривичниот суд за предметите во кои обвинет е Груевски.