Собранието се уште нема план како ќе ги троши парите од буџетот за референдумот.
Парите – 1,3 милион евра денеска биле префрлени на посебната сметка на Собранието.
На координацијата на пратеничките групи утринава не било договорено како ќе се распределат парите наменети за кампањата ,,ЗА“ референдумот. Можно е до крајот на неделава да се одржат средби со ДИК и со претставници на Агенцијата за медиуми за да се договори на кој начин ќе се делат парите за кампањата.
41 процент од вкупната сума (повеќе од 500.000 евра) ќе се вратат во буџетот, откако пратеничката група на ВМРО ДПМНЕ побара парите наменети за нив да се пренаменат за други цели.
Од Собранието денеска одговорија дека ,, парите не можат да се пренаменат за други цели, односно ќе останат неискористени“.
Претходно, 71 пратеник го известија претседателот на Собранието дека се во коалицијата „За референдум“, што е 59 проценти од времето за повластено рекламирање во медиумите.
Според планот на Агенцијата за медиуми, поддржувачите на кампањата „За“ референдумот имаат 5,3 минути за рекламирање во еден час.
Од ВМРО ДПМНЕ се уште не се изјасниле официјално каков е ставот за референдумот.
Мицкоски вчера од протестниот собир во Кичево навести дека и до денот на гласање на референдумот, ВМРО ДПМНЕ можеби ќе остане без конкретен став.
„Кој е Христијан Мицкоски да му каже на народот што треба да прави. Да се обидува да го замајува со скапи маркетиншки трикови и странски PR советници. Кој ми го дал мене тоа право?! Моментот кога одбрав да влезам во политиката, свесно одбрав да бидам слуга на тој мој народ и така ќе продолжам да бидам“, кажа Христијан Мицкоски, претседател на ВМРО-ДПМНЕ.
Мицкоски на почетокот на месецов рече дека партијата ќе го соопшти ставот за рефрендумот околу 10 септември.