Македонските одбојкари почнаа со пораз на 31. Европското првенство во Словенија, Франција, Холандија и Белгија. Финска ги доби „црвено-жолтите“ со 3:1 (по сетови: 25:23, 25:22, 23:25, 25:21) во натпревар од првото коло во групата Ц чиј домаќин е Љубљана.
Една од причините за конечниот исход во арената „Стожице“ беше и неискуството на националниот тим. Во сите четири сета беа резултатски блиску до противникот од северот на континентот, но успеаја да запишат само еден.
Во еден момент во првиот имаа и четири поени предност што, сепак, не беше доволно и за водство. Идентична беше сликата и во вториот сет, го решија во своја корист третиот, а Финците ја искористија првата од четирите меч топки на крајот (сервис грешка на Славе Наков) и по 116 минути ги освоија првите бодови во групата.
Статистички, Финска предничеше во сервисот и, особено во блокот и одлично ги валоризира двата сегмента. Македонските одбојкари губеа, но и освојуваа поени во серија. Еден од најзабележителните во во третиот и во четвртиот сет беше Ристо Николов и на сервис и на блок, а затаи ефектот на капитенот Никола Ѓоргиев и на Александар Љафтов во последниот период од натпреварот.
Ѓоргиев, Николов и Љафтов реализираа по 14 поени, два помалку од нив реализира Филип Маџунков. Најефикасен во мечот беше Финецот Урпо Сивула со 17 поени.
Русија ја оправда фаворитската улога во мечот со Турција и славеше со 3:1 (по сетови: 25:13, 23:25, 25:17, 25:15), а од 20.30 часот Словенија и Белорусија ќе го комплетираат првото коло во групата Ц.
Македонската репрезентација утре попладне (17.30 ч.) ќе игра против Турција во потрага по првата победа на шампионатот.
ЕП во одбојка (м)
Група А (Франција)
Бугарија – Грција 3:0 (25:22, 25:16, 25:20)
Португалија – Италија 0:3 (21:25, 10:25, 22:25)
Франција – Романија (20.45 ч.)
Група Ц (Словенија)
Турција – Русија 1:3 (13:25, 25:23, 17:25, 15:25)
Финска – Македонија 3:1 (25:23, 25:22, 23:25, 25:21)
Словенија – Белорусија (20.30 ч.)