Оле Гунар Солскјер е свесен дека Манчестер јунајтед е пред елиминација во осминафиналето во Лигата на шампиони. ПСЖ славеше со 2:0 на „Олд Трафорд“, резултат што ја прави, речиси, невозможна мисијата на „црвените ѓаволи“ во Париз. Но, Норвежанецот нема намера да се предаде иако поразот го опиша како враќање во реалноста по позитивната низа во Премиерлигата.
Првиот гол на Кимпембе го смета за клучен момент во натпреварот по кој призна дека парижаните биле подобри на тревникот.
„По првиот гол тргнаа во налет и го контролираа мечот. Се виде дека долго време не сме играле на такво ниво. Имаме уште многу да учиме. Можеше да заврши и поинаку, Овој пораз нè врати во реалноста, но нема да ја одреди сезоната. Ќе одиме во Париз да одиграме подобро од Манчестер“, рече Солскјер.
Манчестер јунајтед во првото полувреме остана без двајца повредени фудбалери меѓутоа Солскјер не сака да се вади на тоа како причина за поразот.
„Не може да се криеме зад повреди бидејќи имаме квалитетни играчи кои може да влезат во игра. Лингард и Марсијал многу н` значат и се надевам дека нивните повреди не се сериозни. Ќе треба да почекаме неколку денови. Што се однесува до црвениот картон на Погба, се обиде да се загради, но немаше среќа. Дани Алвеш, сепак, е доволни паметен за да се постави на време“, дополни менаџерот на Манчестер јунајтед.
Вовратниот дуел меѓу ПСЖ и Манчестер јунајтед е на 6 март на „Паркот на принцевите“ во Париз.