Турција планира во 2022 година на пазарот да извади сопствен електричен автомобил. Во фабрика во провинцијата Бурса треба да се произведуваат до 175.000 автомобили годишно. Претседателот Реџеп Таип Ердоган со голема помпа ја претстави новата домашна марка на автомобили.
„Денеска е историски ден за нашата земја, се остварува нашиот 60- годишен сон“, изјави вчера Реџеп Таип Ердоган на презентацијата на прототипот на автомобил во Гебзе кај Истанбул и истовремено порача еден автомобил за себе.
Станува збор за електричен автомобил чие производство треба да започне во 2022 година, а името ќе биде познато во 2020 година. На бината Ердоган презентираше два автомобилски модела. Во новата фабрика треба да бидат ангажирани околу 4.000 вработени, а турскиот конзорциум кој стои зад инвестицијата, планира во развој на автомобилите да вложи преку три милијарди евра.
Сопствена турска марка автомобили е долгогодишна желба на турскиот претседател. Ердоган изјави дека Турција заслужува повеќе отколку да склопува автомобили на други автопроизводители. Земјата за првпат се обиде да произведе свој автомобил во 1961 година, под називот „Деврим“ (револуција), но неговото производство никогаш не ја надмина фазата на прототип.
Турскиот електричен автомобил е планирано прво да се продава во Европа, а потоа и низ светот. Проектот треба да ја симболизира растечката економска моќ на земјата, а владата финансиски го потпомага. Се зборува и за гаранција дека владата ќе купи 30.000 автомобили до крајот на 2035 година.
На автомобилската индустрија во Турција, каде произведуваат и фирми како Форд или Фиат, во последно време и` оди лошо. Во 2018 година внатрешниот пазар доживеа пад, меѓу другото и поради монетарната криза. Годинава, пак, германскиот автопроизводител Фолксваген ги стави на мраз плановите за подигање фабрика во Маниса, а причина е турската воена офанзива во северна Сирија.
Новиот проект за турски електромобили не може краткорочно да и` помогне на индустријата за излез од тешката ситуација, зашто автомобилите би стигнале на пазар дури во 2022 година, истакна шефот на Здружението на турските автомобилски лиферанти, Алпер Канџа, но доколку се` оди добро, профитот ќе се прикаже по три години. Цената на турските автомобили засега не е позната.