Антикорупциската комисија за в четврток закажа јавна седница на која ќе се разгледуваaт две претставки кои вчера ги поднеле дополнителниот заменик министер за внатрешни работи, Оливер Андонов, и коалицијата предводена од ВМРО-ДПМНЕ на претстојните избори.
Двата приговори се идентични, а се однесуваат на членот 8-а од Изборниот законик кој го уредува начинот на располагање и трошење на парите од буџетот за време на изборната кампања.
Дополнителниот заменик министер за внатрешни работи, Оливер Андонов, за НОВАТВ вели дека поднел претставка до Антикорупциска комисија, затоа што министерот Оливер Спасовски, вршел прераспределба на работни места во време кога се распишани изборите.
„Тоа што го прави Спасовски е спротивно на Законот за изборите. Станува збор за дваесетина лица на кои тој им направил прераспределба на работните места, иако тоа не смее да се прави откако ќе се распишат изборите“, вели Андонов во изјава за НОВАТВ.
Заменикот на Спасовски не сакаше да каже за какви работни места станува збор и рече дека се` пишува во документите кои Комисијата ќе ги разгледува на јавна седница во четврток.
Министерот Оливер Спасовски тврди дека не се вистина наводите на Андонов и оти во моментов нема никаква реорганизација во Министерството за внатрешни работи.
„Не постојат решенија за прераспеделување во МВР и од кога е почната кампањата не е донесено ниту едно такво решение. Постојат единствено наредби за пополнување на празни места каде што недостасува работен кадар, и тоа е претежно во пограничните појаси. Но, нема ниту едно единствено решение за прераспределба на било кого во МВР“, вели за НОВАТВ министерот Оливер Спасовски.
Според одредбата 8-а од Изборниот законик на која се повикува Андонов, во овој предизборен период не смее да се располага со пари од државниот буџет, ниту пак смее да се почне постапка за нови вработувања или пак делење на откази во државните институции.
НОВАТВ минатата недела објави дека во Здравствениот дом во Скопје, на стартот на кампањата, се вработиле 50 нови лекари и медицински сестри, а објаснувањето оттаму беше дека огласот за нови вработувања бил објавен пред да бидат распишани изборите.
Овој состав на Антикорупциската комисија за две години има одржано три прес конференции и важи за една од најнетранспарентните институции. Комисијата досега не поведе ниту еден случај по однос на извештаите на ОБСЕ/ОДИХР за прекршувања на Изборниот законик, иако имаат мандат да ги следат истите и да реагираат по допрен глас. Антикорупционерите не се произнесоа по ниту еден случај кој произлезе од прислушуваните разговори, како на пример случајот со плацевите на Водно на кумот на Груевски, или пак за скриениот имот на екс шефот на тајната полиција Сашо Мијалков во Чешка.
Јавната седница на антикорупционерите за предметот „Оливер против Оливер“ ќе се одржи задутре во 11 часот.