Советот за безбедност на Република Северна Македонија денеска ќе одржи седница на која се очекува да донесе одлука за продолжување на вонредната состојба во земјата за справување со пандемијата на ковид-19. Првата одлука за воведување на вонредна состојба за територијата на целата држава во траењето 30 дена беше прогласена на 18 март, во момент во кој имаше 41 заболено лице. Заклучно со вчерашниот ден, во земјава има вкупно 974 дијагностицирани случаи, излекувани се 98, а починаа 45 лица.
Владата, на 41. седница одржана на 14 април, донесе одлука да достави предлог до претседателот Стево Пендаровски за продолжување на вонредната состојба. Заедно со предлогот е проследен и извештај за досега преземените активности од државните институции, во кој се аргументира дека за успешно справување со коронавирусот во државата е неопходно вонредната состојба да остане на сила.
Претседателот Пендаровски, пред неколку дена најави дека шансите се извесни и големи да се прогласат нови 30 дена вонредна состојба, бидејќи внатрешната состојба не ескалира, но истовремено не е значително редуцирана, па ситуацијата сè уште наложува ваков тип на ангажман од сите надлежни институции и ваков тип на состојба.
На денешната седница, како што соопшти Кабиентот на шефот на државата, покрај постојаните членови на Советот, на покана на претседателот Пендаровски, ќе присуствуваат и вицепремиерот задолжен за европски прашања и национален координатор за странска помош Бујар Османи и министерот за здравство Венко Филипче.
Според последните податоци од Министерството за здрваство, на Клиниката за Инфективни болести и фебрилни состојби хоспитализирани се вкупно 57 од кои 14 на кислородна поддршка и шест на механичка вентилација.
Во болницата „8 Септември“ се хопситализирани вкупно 34 лица. На респираторна машина се шест пациенти, а осум пациенти имаат потешка клиничка слика. Во Битолската болница се хоспитализрани шест пациенти, сите во подобрена состојба. Во болницата во Штип се лекуваат вкупно осум пациенти, сите се стабилни, а во домашни услови се следат уште 17 пациенти.
Првиот случај на зазарен со корона вирус во нашата земја беше регистриран на 26 февруари годинава, а полициски час за првпат на целата територија на државата беше воведен на 22 март.