Советот за безбедност напладне (12 ч.) во претседателската вила Водно ќе одлучува за евентуално продолжување на вонредната состојба. Денеска е последниот ден кога истекува третата одлука за вонредна состојба (двонеделна) што ја прогласи претседателот Стево Пендаровски на 15 мај.
На седницата, покрај постојаните членови на Советот, на покана на претседателот Стево Пендаровски ќе присуствува и министерот за здравство, Венко Филипче, соопшти Кабинетот на шефот на државата.
Премиерот Спасовски во четвртокот изјави дека се прават проценки дали ќе биде побарана нова вонредна состојба, но нагласи дека по нејзиното завршување, според Уставот и законите, треба да продолжат изборните дејствија кои беа прекинати поради пандемијата и во рок од 22 дена да се одржат предвремените парламентарни избори.
Претседателот Пендаровски, почнувајќи од 18 март досега донесе три одлуки за прогласување вонредна сотојба. Првите две беа во времетраење по 30 дена, а последната од 14 дена. Одлуките на шефот на државата за прогласување вонредна состојба останаа непотврдени од Собранието, поради тоа што тоа е распуштено.
Ако парламентарниот состав не беше распуштен, наместо претседателот Пендаровски, Собранието ќе требаше да ги донесе одлуките за прогласување вонредна состојба, како што е предвидено со Уставот.
Првите две одлуки за вонредна состојба беа разгледувани пред Уставниот суд, но тој реши дека нема основа за поведување постапка за оценување на нивната уставноста и законитост.