Советот за утврдување факти, во понеделникот, до Судскиот совет го доставил предлогот со кој бара да биде разрешен петчлениот Кривичен совет на Врховниот суд, на чело со претседателот Јово Вангеловски, којшто одлучуваше за притворот на бизнисменот Сеад Кочан, дознава порталот „ПРАВОСУДСТВО.МК“ од неофицијални, но доброупатени судски извори.
До крајот на неделава ќе биде доставено и барањето за отварање постапка за разрешување, заради нестручно и несовесно постапување и на судии од Апелациониот суд во Скопје и на Врховниот суд, кои одлучуваа за притворите на двајцата обвинети Горан Грујовски и Никола Бошковски, кои сега се во бегство, а кои се обвинети во случајот „Тврдина и Таргет“.
Сеад Кочан е првообвинет во случајот наречен „Труст“. Станува збор за предмет кој е влезен во судска постапка и тоа во една поодмината фаза. Кочан се товари дека со неговата фирма „Трансмет“ и фирмите „Силекс неметали СТ“ и „Вато“, како конзорциум, го добил тендерот на „Електрани на Македонија“, и покрај тоа што не биле исполнети предвидените тендерски услови, но наплатил милијарда денари и дополнително, со анекс на договорот, уште 60 милиони денари или се вкупно 17.2 милиони евра.