Градежните зафати на стадионите на кои ќе се играат натпревари на наредното светско фудбалско првенство доцнат и, како што пишува на интернет страницата на Владата на Русија, наместо до декември 2017 година ќе финишираат во 2018 година. Ова особено се однесува на објектите во Волгоград и во Нижни Новгород. Во соопштението не е прецизирано кога точно ќе завршат.
Организаторите на мундијалот во 2018 година засега молчат по ваквите најави, но претходно порачаа дека сите стадиони ќе бидат подготвени за настанот. Русија и во изминатиот период се соочуваше со одложување на работите на стадионот во Санкт Петербург чиј капацитет треба да биде проширен на 68.000 седишта.
Мечеви на светското првенство во Русија ќе се играат на 12 стадиони во 11 градови. Два се наоѓаат во Москва. Едниот е стадионот „Лужники“ (капацитет 81.000) и вториот е новата „Откритие арена“ (капацитет 45.360), новиот дом на Спартак. Останатите градови домаќини се Санкт Петербург (стадион „Крестовски“ – капацитет 68.134), Екатеринбург (стадион „Централ“ – капацитет 35.000), Калининград („Калининград арена“ – капацитет 35.000), Казан („Казан арена“ – капацитет 45.379), Нижни Новгород (стадион „Нижни Новгород“ – капацитет 44.899), Волгоград („Волгоград арена“ – капацитет 45.568), Самара („Самара арена“ – капацитет 44.918), Саранск („Мордовија арена“ – капацитет 45.015), Ростов на Дон („Ростов арена“ – капацитет 45.000) и Сочи (олимписки стадион – капацитет 47.659).
Мундијалот во Русија ќе почне на 14 јуни и ќе трае до 15 јули во 2018 година.