Фаворитите според планот и очекувањата, Франција подобра од Шпанија во дербито на денот во главната фаза на Светското ракометно првенство.
Германија го совлада Исланд со 25:22 во распродадената „Ланксес арена“ во воведните мечеви во новоформираната група Е во Келн. Исланѓаните успеваа да држат резултатски чекор во првата половина од првото полувреме по што „панцирите“ го засилија темпото во двата правца и паузата ја дочекаа со плус 4 (14:10). Скандинавците во продолжение се обидоа да се вратат во игра меѓутоа се што направија беше доближување во два наврата на два гола од ко-домаќинот на турнирот кој на голот го имаше одличниот вечерва Волф.
Данска очекувано излезе на крај во дуелот со Унгарија во групата Ф со 25:22, конкуренција во која и Шведска беше убедлива против Тунис 35:22.
Франција, пак, славеше над Шпанија со 33:30 и привремено го презеде врвот на табелата во групата Е бидејќи утре попладне (18 ч.) непоразената досега Хрватска ќе игра со Бразил. „Триколорите“ беа во водство од прва до последна минута во пресметката со „црвената фурија“, а во еден момент имаа и шест гола повеќе од ривалот (26:20). Шпанците намалија на 32:30 во финишот, имаа и два напада за минус 1 во што ги спречи голманот Цирил Димулан.
Најефикасни кај актуелните светски прваци беа Дика Мем и Лудовик Фабрегас кои постигнаа по шест гола, прв стрелец во натпреварот беше Феран Сала Соле со 11 погодоци.
Денеска на СП настапи и Македонија во разигрувањето за пласман од 13 до 16 место. „Црвено-жолтите“ загубија од Русија со 28:30 и утре од 13 часот во Келн ќе играат против Чиле за утешното 15. место на ревијалниот „Президент Куп“.
СП во ракомет (м) – главна фаза
Група Е
Германија – Исланд 25:22
Франција – Шпанија 33:30
Табела: Германија 5, Франција 5, Хрватска 4 (-1), Шпанија 2, Бразил 0 (-1), Исланд 0.
Двојки за недела (20 јануари): Бразил – Хрватска (18 ч.), Исланд – Франција (20.30 ч.)
Група Ф
Данска – Унгарија 25:22
Тунис – Шведска 23:35
Табела: Данска 6, Шведска 6, Норвешка 2 (-1), Египет 1 (-1), Унгарија 1, Тунис 0.
Двојки за недела (20 јануари): Унгарија – Тунис (18 ч.), Норвешка – Египет (20.30 ч.)
Разигрување за пласман од 13 до 16 место
Русија – Македонија 30:28
Чиле – Катар 27:37
Двојки за недела (20 јануари): Македонија – Чиле (13 ч.), Русија – Катар (15.30 ч.)
Разигрување за пласман од 17 до 20 место
Австрија – Аргентина 22:24
Србија – Бахреин 32:27
Двојки за недела (20 јануари): Бахреин – Австрија (18 ч.), Србија – Аргентина (20.30 ч.)
Разигрување за пласман од 21 до 24 место
Саудиска Арабија – Ангола 34:29
Кореја – Јапонија 27:25
Двојки за недела (20 јануари): Јапонија – Ангола (15.30 ч.), Кореја – Саудиска Арабија (15.30 ч.)