Македонија попладнево на мегдан со Словенија во третото коло на Светското ракометно првенство во Франција. Словенците важат за фаворити, но и „црвено-жолтите“, сепак, не се без шанси. Позитивен резултат е, секако, можен. Потребна е тимска игра, осцилации на минимум како и технички грешки, цврста одбрана, максимална концентрација во напад и ладна глава во двата правца. Сето тоа во функција на спротивен почеток од оној против Ангола како предуслов за фаќање посакуван правец во мечот во „Мец арена“ што почнува во 17,45 часот. Магнет ќе биде и тактичкото надмудрување меѓу Лино Червар и Веселин Вујовиќ.
Од двата табора се изразува меѓусебен респект. Кире Лазаров ја препушта фаворитската улога на Словенците за кои вели дека се поискусни, имаат подолга клупа, подолг период играат заедно, учестуваа и на Олимписките игри во Рио каде го освоија четвртото место. Вујовиќ го истакна токму капитенот и Филип Миркуловски како „срце и бели дробови“ на репрезентација на Македонија. Тренерот кој неколку години беше на кормилото на Вардар е одлично упатен во македонските ракометни прилики и во него се гледа можеби и најголемото оружје на „змајчеки“ денеска.
„Словенците се одлично подготвени и на тактички и на технички план. Можеби не се дотолку корпулентни и добри на физички план колку што се импресивни во брзина и креација. Бомбач, Зорман и Скубе ги немаат, сега ги имаат Зарабец и Безјак. Мора да бидеме цврсти во одбрана и да не оставаме многу простор. Мора и техничките грешки да ги намалиме бидејќи знаат да казнат во контранапади што ги изведуваат меѓу најдобрите во Европа“, истакна Червар.
Македонија посакува реприза на Европското првенство во 2012 година на кое ја совлада Словенија со 28:27. Словенците посакуваат повторување на Светското првенство во Катар во 2015 година кога славеа со 30:28 во осминафиналето. Двете селекции имаат одиграни и две пријателски средби што завршија без победник (28:28 и 23:23).
Лино Червар по мечот со Ангола истакна дека доаѓаат три уште потешки натпревари за Македонија на ракометниот мундијал во Франција. Притоа изрази и верба во успех во барем еден во нив против Словенија, Шпанија и Исланд. Скалпот што ќе значи и дефинитивна заверка на „црвено-жолтите“ на место во осминафиналето може да падне уште попладнево. Кој знае.
СП во ракомет
Денеска играат
Група А
Полска – Русија (20,45 ч.)
Група Б
Македонија – Словенија (17,45 ч.)
Шпанија – Ангола (20,45 ч.)
Група Ц
Унгарија – Чиле (17,45 ч.)
Хрватска – Белорусија (20,45 ч.)
Група Д
Египет – Бахреин (17,45 ч.)
Данска – Шведска (20,45 ч.)