Македонија го претрпе и вториот пораз на ракометниот шампионат во Франција. Шпанија вечерва беше, резултатски, подобра со 29:25 во четвртото коло и изби на челната позиција во групата Б. Ривера со 11 гола беше најефикасен на средбата, Кире Лазаров ги предводеше „црвено-жолтите“ со шест гола од кои два од пенал линијата. За неполни 24 часа македонските репрезентативци (утре попладне, 17,45 ч.) ќе играат со Исланд за третото место во групата за избегнување на Франција и за дуел со Норвешка во осминафиналето.
Одлично издание на „црвено-жолтите“ во првото полувреме. Конечно имаа влез во натпревар во кој важеа за аутсадери каков немаа во оние два во кои беа фаворити и секако против Словенија, влез каков што посакуваше Червар и целокупната јавност. Отсуството на притисок го стори своето кај селекцијата на Македонија. Свесна дека нема што да загуби, заигра послободно, беше рамноправна, искористи моменти и да подари атракции на гледачите, па и ефектот го отсликаа и бројките на семафорот (14:14).
Лазаров со два цепелина за „фуријата“, еден на Миркуловски
Белег на првите 30 минути беа двата дуплекс цепелина што со ефектна завршница на Кире Лазаров по асистенции на Дејан Манасков и на Гоце Георгиевски. Комплетната одбрана на „фуријата“ како и голманот Перез де Варгас беа гледач повеќе во арената во Мец во моментите за ТВ шпици. Головите што ги постигна капитенот, без дилема, се најубавите во групната фаза на мундијалот, а можеби ќе конкурираат и за најубави на целокупниот шампионат. Во второто полувреме капитенот во улога на асистент, Миркуловски во улога на егзекутор.
Шпанците додадоа гас во продолжение
Второто полувреме донесе подруга слика во која главниот збор го имаше ривалот. Ја стегна одбраната, додаде гас во нападот, малку падна концетрацијата и кај „црвено-жолтите“ што, како микс, и резултатот почна да натежнува на страна на репрезентацијата со двајца „вардарци“ (Душебаев и Кањелас) и дел од соиграчите на Лазаров во Барселона.
„Петте минути“ значеа одлепување на Шпанците на безбедна разлика што знаеја и како да ја приведат до крај. До 50-та минута заостанувањето и се гледаше достижно како предуслов за одржување на тензија меѓутоа во завршните десетина минути се претвори во недостижно. Составот на Рибера не попушти во темпото, принудуваше на грешки на кои се надоврза и Перез де Варгас со неколкуте интервенции за конечни 29:25.
Македонија нема причина да биде разочарана. Одигра добар меч, покажа дека може да се носи и со голема репрезентација каква е Шпанија и ја подигна самодовербата пред Исланѓаните против кои, исто така, ги очекува тежок ракометен час. Од исходот ќе зависи и наредниот противник на мундијалот, а настапот ќе покаже колку вечерашниот ставил трага на физички и на психолошки план кај избраниците на Лино Червар.
Македонија – Шпанија 25:29 (14:14)
„Арена во Мец“. Гледачи: 4.000. Судии: Гателис/Мазеика од Литванија
Македонија: Колев (4 одбрани), Трајковски (4 одбрани) 1, Манасков 2, Стоилов 3, К. Лазаров 6, Митков, Дрогришки, Талески, Миркуловски 4, В. Маркоски, Н. Маркоски 5, Георгиевски 3, Ф. Лазаров, Ојлески, Поповски, Нелоски 1. Селектор: Лино Червар
Седмерци: 2/2. Исклучувања: 4 минути. Загубени топки: 12
Шпанија: Де Варгас (13 одбрани), Коралес, Гурбиндо, Фернандез 2, Ривера 11, Томас 2, Ентрериос, Душебаев 5, Сармиенто 3, Агинагалде, Кањелас 1, Морос 1, Гвардиола 1, Гони 1, Балагер 1, Фигерас 1. Селектор: Жорди Роман Рибера
Седмерци: 5/5. Исклучувања: 4 минути. Загубени топки: 12
СП во ракомет
Група Б, 4. коло
Македонија – Шпанија 25:29
Шпанија – Ангола 42:22
Словенија – Тунис 28:28
Табела: Шпанија 8, Словенија 7, Македонија 4, Исланд 3, Тунис 2, Ангола 0
Група Ц, 4. коло
Хрватска – Чиле 37:22
Белорусија – Германија 25:31
Саудиска Арабија – Унгарија 24:37
Табела: Германија 8, Хрватска 8, Унгарија 4, Белорусија 2, Чиле 2, Саудиска Арабија 0
Група Д, 4. коло
Шведска – Катар 36:25
Данска – Бахреин 30:26
Аргентина – Египет 26:31
Табела: Данска 8, Шведска 6, Египет 6, Катар 4, Бахреин 0, Аргентина 0