Македонија против Русија го почнува третото учество на светските ракометни првенства во младинска конкуренција. Дебитантскиот настап во 1997 година го заврши на 15 место, на мундијалот во 2007 година беше десетта, а на тековното што почна денеска во Алжир посакува да забележи нов напредок.
Оптимизам за добро претставување на ова СП е, секако, присутен меѓу „црвено-жолтите“ кои до него стигнаа без пораз во квалификациите. Ја совладаа Полска со 30:22 и Турција со 39:19 и ремизираа (21:21) со Португалија што беше доволно за прво место во групата.
Филип Талески и Мице Шилегов се издвоија како клучни играчи во составот на Илија Темелковски во квалификациите. И ракометарот на германски Рајн Некар Левен и на Металург 2 постигнаа по 20 гола во пресметките против Полјаците, Турците и Португалците, па затоа од нив се очекува да бидат двигатели на националниот тим и сега во Алжир. На нивните квалитети и ефикасност во нападот се темелеше и физиономијата на репрезентацијата за претстојните мечеви.
Ждрепката за СП во Алжир ја смести Македонија во групата Ц заедно со Шпанија, Тунис, Бразил, Буркина Фасо и денешниот ривал Русија.
Распоред на натпревари Македонија на СП во ракомет (У20) во Алжир
18 јули: Македонија – Русија (15 часот)
20 јули: Буркина Фасо – Македонија (21 часот)
21 јули: Тунис – Македонија (19 часот)
23 јули: Македонија – Шпанија (19 часот)
24 јули: Македонија – Бразил (19 часот)