Интер е единствениот италијански претставник во Лигата на шампиони што не успеа со победа да влезе во новото издание на Серија А. Сасуоло го шокира „нероазурите“ со 1:0 за петта победа во последните седум меѓусебни пресметки.
Екипата од „Џузепе Меаца“ им подари разочарување на симпатизерите кои, пак, очекуваа три бода на стартот на сезоната со оглед на многуте засилувања во летниот преоден рок. Но, наместо три бода добија бледа игра од своите миленици. Но, и „тенко“ објаснување од Лучано Спалети кој причините за поразот не ги лоцира само кај фудбалерите.
„Игравме како што моравме. Сасуоло беше ориентиран на контранапади бидејќи лесно е да се биде позади, да се чека, па да се притисне противникот. Теренот, исто така, беше невозможен за игра. Разликата е голема кога играте на терен на каков што игравме и се обидувате да имате посед на топка наместо да играте на контри. Мечот го загубивме поради пеналот“, истакна Спалети.
Парма на враќање во Серија А испушти два гола предност во дуелот со Удинезе. Конечни 2:2 на „Енио Тардини“ иако домашните имаа и ритам и 2:0 по еден час игра. Меѓутоа погодоци на Инглезе во 43. минута и на Барила во 59. минута ги поништија Де Пол во 65. минута од пенал и Фофана во 69. минута за поделба на бодовите.
Рома се враќа со големи три бода од гостувањето во Торино по минималниот триумф над истоимениот домаќин со 1:0. Победникот го реши Един Џеко со голот во 89. минута.
Серија А, 1 коло
Сасуоло – Интер 1:0
Парма – Удинезе 2:2
Болоња – СПАЛ 0:1
Емполи – Калјари 2:0
Торино – Рома 0:1
Лацио – Наполи 1:2
Киево – Јувентус 2:3
Аталанта – Фрозиноне (понеделник, 20.30 ч.)
Милан – Џенова (одложен)
Сампдорија – Фиорентина (одложен)