Премиерот и потпретседател на СДСМ, Оливер Спасовски наскоро очекува да биде формирана новата Влада на чело со СДСМ. Во тој контекст ги оцени како небулозни обвинувањата од опозицијата за купување пратеници и потенцира дека нови избори ќе нема.
„Наводното купување на пратеници е уште една небулоза на Мицкоски од спектарот небулози што секојдневно ги кажува. Ние сме сериозни и така ќе се однесуваме и при формирањето на владата. Низ разговор, низ дијалог, со прифаќање на принципите за кои се залагаме, тоа ќе биде основа на која ќе побараме поддршка од пратениците во македонското собрание. Очекувам тоа да се случи многу скоро, по конституирањето на македонското Собрание“, рече Спасовски за „Утрински брифинг“.
Во врска со тоа дали имаат неофицијални разговори околу новата Влада, Спасовски повтори дека СДСМ и коалицијата ќе почнат на таа тема по националниот празник Илинден.
„Инаку секако дека имаме контакти. Разговараме со политичките партии, меѓутоа, детално околу парламентарното мнозинство, околу Владата, официјалните разговори ќе почнат по Илинден, со партии кои, пред сè, се проевропски кои имаат перспектива и визија за државата“, рече Спасовски.
Запрашан за коментар на изјавата на лидерот на ВМРО-ДПМНЕ, Христијан Мицкоски дека ќе има нови избори на есен, Спасовски рече оти тој постојано ги менува ставовите.
„Мицкоски секој ден ги менува ставовите. Нели до пред некој ден велеше дека тој ќе формира влада, дека составува парламентарно мнозинство. Сега вели нови избори. Тоа е сепак негова работа. Изборите поминаа. На нив има јасен победник. Тоа е СДСМ. Ние ќе ја формираме новата влада“, истакна Спасовски на „Слободна ТВ“.