Техничкиот премиер Оливер Спасовски изрази сочувство до настраданите во катастрофалниот земјотрес што синоќа ја погоди источна Турција.
„Изразуваме силна поддршка и солидарност со Турција и турскиот народ. Сочувство до семејствата на загинатите во страшниот земјотрес. Нашите мисли се со турските граѓани. Подготвени сме да помогнеме“, напиша на Фејсбук, премиерот Спасовски.
Сочувство изрази и доскорашниот премиер и актуелен лидер на СДСМ, Зоран Заев.
„Стигнуваат вознемирувачки вести од Источна Турција како последица на силниот земјотрес што се случи ноќеска. Изразуваме сочувство до семејствата на жртвите и посакуваме колку што е можно помала штета. Нашите мисли вечерва се со турскиот народ“, објави Заев на Твитер.
Во земјотресот со јачина од 6,8 степени по Рихтер, според последните информации од турските власти, животот го загубија најмалку 21 лице, повеќе од 1.000 се повредени, а причинета е голема материјална штета.