Министерот за внатрешни работи Оливер Спасовски писмено реагира на телеграмата на дополнителниот заменик-министер Митко Чавков испратена до сите организациски единици во МВР.
Во телеграмата на Чавков испратена пред 2 дена, се вели дека Спасовски незаконски ги донел Решенијата за уназадување или разрешување на раководни работни лица во Министерството.
Спасовски пак реагира дека тој како министер е задолжен за раководство со министерството, додека заменик-министерот учествува во прашањата поврзани само со организацијата на изборите.
„Согласно Законот за организација и работа на органите на државната управа (член 47 став 1), со работата на министерството раководи министерот, додека правата и обврските на дополнителниот заменик на министерот за внатрешни работи се уредени со измените на Законот за Владата на Република Македонија од 2015 година, според кои дополнителниот заменик на министерот заедно и рамноправно со министерот учествува во остварувањето на надлежностите предвидени во Законот за организација и работа на органите на државната управа и ги разгледува и ги потпишува сите акти и документи кои ги донесува министерот а се однесуваат на правните, финансиските и кадровските прашања поврзани со организацијата на изборите.
Согласно ова, уште еднаш ве известувам и ви укажувам дека согласно Законот за организација и работа на органите на државната управа и Законот за внатрешни работи министерот е функционерот кој раководи со министерството за внатрешни работи поради што наредувам од ваша страна да не се преземаат никакви конкретни и поединечни дејствија, а уште помалку постапување по Телеграмата Бр.08.1-472 од 19.04.2016 година на дополнителниот заменик министер за внатрешни работи Митко Чавков.“ се вели Спасовски.