Tреба да се бориме радикално против криминалот и корупцијата и дека секој нелегално и бесправно стекнат имот треба да биде конфискуван, рече министерот за внатрешни работи Оливер Спасовски како последица на запленетиот имот во Охрид по налог на јавното обвинителство.
„Во сите години на независна Македонија имавме многу малку случаи на конфискација на имот. Тоа праќаше една порака до криминалните структури дека и покрај криминалните активности, стекнатиот имот нема да биде конфискуван. Сега начинот на работењето концептуално е сменет и кај МВР и кај Јавното обвинителство. Паралелно со сите постапки и истраги, се води и финансиска истрага и врз основа на наредбите што ги добиваме од Јавниот обвинител, ние постапуваме и не само конкретно за еден настан или случај туку за сите ќе се постапува така и понатаму и секој нелегално стекнат имот мора да биде вратен на државата, односно, на граѓаните“, порача Спасовски од Прилеп.
На прашање дали и колку бизнисмени досега во МВР пријавиле случај на изнуда или рекет, Спасовски вели дека има пријави и така треба да се постапува во случаите на изнуда и рекет.
„Имаме случаи на пријавување, но нивниот број во моментот не го знам. Се што е пријавено во МВР, ние сме дејствувале и дејствуваме. Сметам дека граѓаните сега се охрабрени да пријавуваат, затоа што институциите функционираат неселективно. Секој кој има закана, е предмет на уцена или добил барање на некаков финансиски надомест, да пријави, а ние да го сработиме и да пратиме порака до граѓаните дека во Македонија нема и не смее да има заштитени“, одговори првиот човек на МВР.
Спасовски ја нагласи потребата од одговорност без разлика кој е или е близок до одредени политички структури. Тој притоа потсети на апелите дека обвинителството и судството мора да застанат на свои нозе и да отворат перспективи во борбата против криминалот.