Во однос на бегството на затвореникот Беким Мемети, министерот за внатрешни работи Оливер Спасовски во гостувањето во ТВ24 кажа дека сите сознанија и информации што МВР ги прибира користат во оперативните активности на Министерството.
-Но тие активности треба да доведат до апсење на конкретното лице. Сите служби работат за прибирање податоци за локацијата на ова лице за тој повторно да се најде пред лицето на правдата. Покрај меѓународната потерница што е обврска да се распише и врз основа сите информации се преземени низа мерки за безбедност и на сите лица што работеле на случајот за Беким Мемети, кажа Спасовски.
Тој додаде дека има нелогичности и затоа се изречени мерки на претпазливост на четворица затворски полицајци.
-Заради сериозноста за делото за кое се суди, дотолку е поголема одговорноста на затворскиот систем, бидејќи не побарале асистенција од МВР. Сите истражни дејствија се преземат заедно со Јавното обвинителство, рече Спасовски.
Тој додаде дека политичките партии се служат со сензационалистички наслови за случајот, но дека е важно да се настапува аргументирано, а не дневно-политички. Спасовски повтори дека затворската полиција е надвор од МВР и Министерството не може да вработува лица во затворската полиција.
Според Спасовски, за овој случај поврзан со бегството треба да се сноси политичка и кривична одговорност.
Хибридните напади ќе останат во фокусот на МВР
Мирна и стабилна е безбедносната состојба во државата, без посебни индиции дека таа може да биде нарушена, оцени министерот за внатрешни работи Оливер Спасовски во гостувањето во ТВ24. Тој кажа дека на безбедносната состојба влијанија имаат случувањата од воената агресија на Русија во Украина, но исто така и други аспекти, како што се економска кризата и енергетската криза, но и случувањата во регионот.
-После Украина секако се зголемија и хибридните напади, но со нив ќе продолжуваме да се справуваме. Сајбер криминалот ќе биде во фокусот и во иднина. Ние немаме подигнато ниво на безбедност. Важно е да се остваруваат нашите стратешки приоритети, особено мирот и стабилноста кај нашите граѓани, рече Спасовски.
Според него, состојбата и покрај сите случувања сега е во нормала, но многу е важно да се прават и проекции за наредниот период.
-Тие проекции ги правиме особено според видот на криминалитетот и тука можат да се вклучат сите безбедносни органи, кажа Спасовски.