До крајот на неделата ќе се направи проценка дали е потребна нова четврта одлука за вонредна состојба, рече денеска премиерот Оливер Спасовски при посетата на трафостаницата на МЕПСО во Штип.
„Ако тоа е потребно, ако се неопходни условите дека преку нова вонредна состојба полесно се справуваме со целата оваа ситуација, тогаш ќе носиме и таква одлука. Меѓутоа сега во овој момент немаме одлука во однос на тоа“, вели Спасовски.
Прашан дали се очекува политичките партии на нова лидерска средба да договорот датум за избори, Спасовски одговори дека политичките партии треба да се договорат врз основа на она што значи позитивни законски прописи во државата.
„Вонредната состојба, прекинот на вонредната состојба и ни остануваат уште 22 дена до изборите и тоа е нешто што сите политичари треба да бидат и одговорни и разумни во овој дел. Очекувам да се поттикне дијалогот меѓу политичките партии. Затоа што денеска се разговара и се зборува за интерес на државата и на граѓаните. Ако најголем интерес е државата и граѓаните, тогаш мислам на минимум треба да се сведат личните или партиските интереси и одлуките да ги носиме во интерес на граѓаните и државата“, вели Спасовски.