Премиерот Оливер Спасовски најави дека градинките ќе бидат отворени штом комплетно заврши скринингот на вработените и кога ќе се почувствува дека децата во нив ќе бидат безбедни. Од Министерството за здравство бил информиран дека процесот на тестирање на сите вработени е при крај по што најави дека ќе разговара прво во Комисијата за заразни болести, а потоа и во Владата за денот на отворањето на градинките.
„Ситуацијата со Ковид-19 секаде е непредвидлива, не само кај нас. Зависно од тоа како ние се однесуваме, може да ја имаме предвидливоста пред нас, а одговорноста на секој еден човек, одржувањето дистанца и носење на заштитна опрема ќе придонесе за подобрување на состојбата со вирусот“, изјави премиерот Оливер Спасовски, кој заедно со заменик министерот за труд и социјална политика Ѓонул Бајрактар и дополнителната заменик министерка за труд и социјална политика, Санела Шкријељ направија увид во градежните работи на нова, енергетски ефикасна градинка во Драчево, општина Кисела Вода.
Спасовски апелираше до граѓаните да бидат испочитувани сите работи што ги предлага Комисијата, а како одлуки ги носи Владата.
„Што повеќе почитуваме мерки, држиме дистанца, што повеќе носиме заштита опрема, толку повеќе и побрзо ќе се враќаме во нормалниот живот во државата. Ковид-19 е болест со која ќе мора да се научиме да живееме и понатаму, меѓутоа одговорното однесување мора да придонесе сето тоа да биде во рамки што може да ги поднесе и здравствениот систем и државата“, рече меѓу другото Спасовски.