Спикерот на Собранието, Талат Џафери, на 30 јули, односно пред летниот одмор на пратеницте, ќе одржи брифинг со новинарите на кој би требало да го соопшти ставот за локалните избори, информираат од неговиот кабинет по изјавите и шпекулациите во јавноста околу можниот датум за одржување на политичката трка.

– Претседателот Џафери следниот петок, односно на 30 јули, ќе има брифинг со новинарите и тогаш ќе го  каже неговиот став за локалните избори – ни изјавија од кабинетот на  Џафери.

Премиерот Зоран Заев вчера најави дека ќе бара согласност од партиите за локалните избори да се одржат на 31 октомври, за да се избегнело нивното поклопување со пописот. Ова, практично, би значело одложување на изборите со оглед на тоа што претседателот Талат Џафери, претходно најави дека изборите би требало да се одржат на 17 октомври, според Уставот.

– Имаме причина за одложување на изборите, а тоа, секако, е пописот кој ќе се спроведува во септември и не сакаме кампањата да се поклопи со него, и секако причината е пандемијата за одлагањето. Така што, ако не се промени тоа со закон, изборите треба да бидат до 17 октомври и ќе имаме поклопување на кампањата со Пописот. Предлогот доминанатно од партиите е да биде 31 октомври, ако се согласат и тоа ќе биде вградено во Изборниот законик, изјави вчера Заев.

Според Антонио Милошоски од ВМРО-ДПМНЕ „датумот не може да се определува според личната желба на политичарите“..

– Уставниот и законски термин за локалните избори е 17 октомври, првиот круг. Сè друго би било неуставно и би можело да го загрози целиот изборен процес како незаконит и незаконски да им се продолжи мандатот на градоначалниците на коишто им истекува мандатот и на советите на општините, изјави пратеникот Милошоски.

Според изјавите, за партијата ДУИ сеедно е кога ќе се одржат изборите, додека за Алијанса за Албанците е прифатлив само  17 октомври  како датум за локалните избори.

Инаку, крајниот рок за распишување на изборите е 7 август, а промената на датумот за избори би требало да биде предложена со закон. Но, за тоа ќе треба да се сложат сите политички партии, бидејќи неопходно е двотретинско мнозинство за измена на Изборниот законик.

(Љ.Б.)