Екс премиерот и екс лидер на ВМРО ДПМНЕ Никола Груевски, според упатниот акт, денеска треба да се јави во истражниот затвор Шутка на издржување на затворската казна од две години за случајот „Тенк“.
Се чека одлуката на Кривичниот совет на жалбата што Груевски преку своите адвокати ја поднесе пред три дена на одлуката на судија за извршување санкции со која во петокот ја одби молбата на Груевски за одлагање на казната. откако ќе пристигне жалбата во судот, Кривичниот совет има рок од три дена да одговори.
Тој беше прогласен за виновен и осуден на двегодишна затворска казна на 23 мај за предметот „Тенк“ за набавка на мерцедесот.
Во меѓувреме, во Собранието е покрената процедура за одземање на пратеничкиот мандат на Груевски, иако тоа нема да влијае на издржување на казната. Откако вчера Комисијата за деловнички и мандатно-имунитетни прашања со мнозинство гласови го прифати барањето на судот да му се одземе пратеничкиот мандат на Груевски заради издржување на двегодишната затворска казна, пленарната седница е следен чекор на која ќе се одлучува дали на поранешниот премиер, а сега пратеник ќе му биде одземен пратеничкиот мандат.
На гласањето не присуствуваа членовите на опозициската ВМРО-ДПМНЕ кои дојдоа на седницата, но по искажаните забелешки на Трајко Вељаноски дека се води политички, а не правен процес, ја напуштија седницата.
Според претседателот на Комисијата Павле Богоевски треба да му се одземе мандатот на Груевски, бидејќи делата кои за кои се товари го прават недостоен за вршење на пратеничката функција.
На седницата не присуствуваше Груевски бидејќи беше на судење за предметот „Титаник“.
Барањето за одземање на мандатот на Груевски е според членот 59 од Деловникот на Собранието на РМ. Со него се предвидува за пратеникот осуден за кривично или друго казниво дело што го прави недостоен за вршење на пратеничката функција, известување до претседателот на Собранието да достави судот кој ја изрекол казната.
Со овој член од собранискиот Деловник е предвидено Предлог за одземање на мандатот на пратеник да поднесе Комисијата за деловнички и мандатно-имунитетни прашања, во рок од 15 дена од денот на добивањето на известувањето од претседателот на Собранието. По предлогот на Комисијата за деловнички и мандатно-имунитетни прашања за одземање на мандатот на пратеникот, Собранието води претрес на првата наредна седница, а претресот може да заврши со донесување одлука за одземање на мандатот на пратеникот или со заклучок дека нема елементи за одземање на мандатот на пратеникот. За да му биде одземен мандатот на Груевски на Собранието му е потребно двотретинско мнозинство. Незивесно е дали за одземање на мандатот на поранешниот премиер ќе гласаат 80 пратеници, ако се знае дека пратениците од опозициската партија ВМРО-ДПМНЕ нема да гласаат за, а најголем дел од пратениците од независната пратеничка група предводена од поранешната министерка за култура Елизабета Канческа Милевска се изјаснија дека нема да гласаат.
Вчера вечер пред Кривичниот суд во Скопје се одржа протест за поддршка на Груевски. Како што изјавија дел од учесниците, како ленови на ВМРО ДПМНЕ самоиницијативно се организирале, обвинувајчи дека врз Груевски се врши политички прогон. Тие побараа од Иванов да го прекине тоа.