Новак Ѓоковиќ е добитник на наградата „Лауреус“ за 2018 година што истоимената фондација го доделува за најдобриот спортист на светот. За српскиот тениски ас и најдобар светски рекет во моментот ова е четврто признание во кариерата по 2012 година, 2015 година и 2016 година.
Во конкуренција за спортскиот оскар беа и Лука Модриќ (фудбал), Леброн Џејмс (кошарка), Килијан Мбапе (фудбал) и Луис Хамилтон (формула 1).
Ѓоковиќ ја заслужи наградата благодарение на неверојатниот кам-бек во минатата година по операцијата на лактот и паузата што ја имаше на АТП турот. До крајот на ланската сезона освои два гренслема (Вимблдон и Ју-Ес опен), го потисна Рафаел Надал од челната позиција на ранг листата, а во ист стил продолжи и во 2019 година со освојување на Австралија опен.
Лански лауреат беше Роџер Федерер кој е рекордер со пет признанија „Лауреаус“, а изборот во 2017 година падна на спринтерот од Јамајка, Јусеин Болт.