Северна Македонија и Бугарија ќе продолжат посветено да го имплементираат Договорот за добрососедство и да ја зајакнуваат соработката во позитивна насока и со поголема волја за решавање на сите предизвици, истакнаа на денешната средба првиот вицепремиер и министер за политички систем и односи меѓу заедниците, Артан Груби и бугарскиот амбасадор, Ангел Ангелов.

Груби му се заблагодари на амбасадорот Ангелов за брзата интервенција на бугарските власти во насока на целосно расветлување на трагичниот настан во кој животот го изгубија 45 патници од Северна Македонија, како и за третманот и укажаната грижа кон преживеаните.

Брзото и успешно затворање на спорот меѓу двете земји беше една од дискутираните теми на средбата меѓу Груби и Ангелов, со цел да се забрза процесот на интеграција на Република Северна Македонија во ЕУ, соопштија од Кабинетот на првиот вицепремиер.

Груби на средбата ја истакна посветеноста на Владата на стратешките цели – почитување на Договорот за добрососедство и на Преспанскиот договор.

Груби и Ангелов, како што се наведува во соопштението, се согласија дека со Договорот за пријателство, добрососедство и соработка, Северна Македонија и Бугарија поставија одлични основи за добра соработка меѓу двете земји.