Премиерот Зоран Заев се сретна со поранешниот евроамбасадор во Македонија, Ерван Фуере, денеска во Скопје.
„Се чувствува слобода и отвореност кај граѓаните, поинаква, позитивна клима во државата по демократските промени. Сега треба само да се продолжи процесот што води до перспективи на Република Македонија и на луѓето кои живеат тука“, му порачал Фуере на Заев, соопштија владините служби.
Тој прене дека во Брисел постои охрабрување дека премиерот Заев и новата Влада ја поставиле Македонија на европскиот пат и дека Заев има поддршка за реформите на коишто интензивно работи Владата.
„Посветено работиме на реформите што треба да донесат квалитетен живот за граѓаните и да придонесат во евро-атлантските интеграции. Дел од нив се и реформите во судството. Покажавме дека сме различни и дека нашата цел е да обезбедиме независно правосудство низ транспарентни одлуки во коишто главниот збор го има независната експертска јавност. Но, како Влада цврсто сме определени кон функционирање на правдата. Законите мора да важат и ќе важат подеднакво за сите“, рекол Заев на средбата.
Тој пред Фуере додал дека властите очекуваат на есен да биде тргната условеноста на препораката на Република Македонија за членство во ЕУ, а во скоро време и отпочнување преговори за членство.
Фуере и Заев, како што соопштуваат владините служби, разговарале и за други прашања од интерес на граѓаните на Македонија, особено за плановите за заштита на животната средина како важен фактор во заштитата на здравјето на граѓаните.
„Поранешниот амбасадор Фуере рече дека ќе продолжи да ги поддржува политиките што носат развој на Македонија. Претседателот на Владата, Заев, во име на граѓаните на Македонија, на Владата и во негово име, се заблагодари на поранешниот амбасадор на ЕУ во земјава, за неговиот голем придонес во демократските процеси во Република Македонија, како и за грижата, љубовта и пријателството што ги покажува и негува и денес кон луѓето во државава и кон Македонија“, се вели во соопштението од Владата.