Најмалку 35 лица загинаа, а 48 се повредени во Керман за време на погребната поворка на иранскиот генерал Касим Сулејмани кој беше убиен во американски воздушен напад во Ирак, пренесе Иранската државна телевизија.
Односите меѓу САД и Иран се доведени на праг на ескалација. Иранците разгледуваат 13 сценарија за одмазда, тврди секретарот на Врховниот совет за безбедност на Иран, Али Шамхани.
„Американците треба да знаат дека досега е разговарано за 13 одмазнички сценарија, па дури и ако постои консензус за извршување на најлошото сценарио, тоа може да биде историски кошмар за Американците“, предупреди Али Шамхани.
Изјавата на Шамхани ја пренесоа западни медиуми повикувајќи се на иранската агенција „Фарс“.
Иранскиот парламент го прогласи Пентагон за терористичка организација
Иранскиот парламент денеска усвои итен закон според кој сите американски вооружени сили се означени како терористички. Законот е усвоен по итна постапка по убиството на Сулејмани.
Парламентот неодамна усвои закон со кои се означуваат американските сили во делот на Африка, централна Азија и на Блискиот исток како терористички. Сега новиот закон се однесува на Пентагон, односно сите американски сили и сите лица вклучени во убиството на Сулејмани.
Столтенберг повикува на воздржаност
Генералниот секретар на НАТО, Јенс Столтенберг повика на воздржаност и намалување на растечките тензии меѓу САД и Иран.
За време на претседавањето со вчерашната вонредна средба со амбасадорите на НАТО во Брисел, тој рече дека 29-те сојузници повикале на воздржаност и деескалација и додаде дека нов конфликт нема да биде во интерес на никого.
Столтенберг ја истакна загриженоста на членовите на Алијансата поради „дестабилизирачките активности на Иран во поширокиот регион на Блискиот исток“. Запрашан за загриженоста во рамките на НАТО во врска со едностраниот потег на Вашингтон, тој додаде дека воздушниот напад е одлука на САД.
Германија и Хрватска ги преместуваат своите војници во Кувајт
Во меѓувреме, Германија најави преместување на дел од своите војници од Ирак во Јордан и во Кувајт. Германскиот контингент со околу 30 војници е сместен во Багдад и во Таџи, град што е северно од ирачката престолнина.
Покрај околината на Багдад, Германија има свои војници и во ирачкиот дел на Курдистан за обука на локалните сили за безбедност.
И 14-те припадници на Хрватската армија се преместени од Багдад во Кувајт, согласно одлуката на НАТО за изместување на мисијата. Хрватското Министерство за одбрана соопшто дека војниците се наоѓаат на сигурно и дека најважна е нивната безбедност.