Една од најконтроверзните личности во историјата на фудбалската игра, Диего Армандо Марадона е хоспитализиран во Кали, Колумбија. Како причина се наведува повреденото колено што пред 17 години го оперира колумбискиот доктор Ернан Очоа, а сега веројатно му создава нови главоболки на Аргентинецот.
„Направивме преглед, во тек е проценка на ситуацијата по што ќе решиме што натаму и дали ќе треба нов зафат“, се зборови на Очоа што ги пренесува британски „Сан“.
Марадона од пред еден месец е „три во едно“ во белорускиот прволигаш Динамо од Брест во кој ги извршува функциите претседател, спортски директор и тренер. Но, според неофицијални информации, Аргентинецот наскоро треба да стане сопственик и на 20 отсто акции во клубот.
Поранешниот аргентински репрезентативец пристигна во Белорусија од Обединетите Арапски Емирати каде една година мина на кормилото на Ал Фуџаирах. Позабележителен успех изостана што сега го бара на екс советската република. Ако ништо друго, тамошниот клуб и фудбал воопшто ќе добие на популарност каква што немал досега.