Генералниот секретар на НАТО, Јенс Столтенберг, во врска со евентуалното неусвојување на нов закон за одбрана и дали тоа го става во опасност членот пет на Повелбата на НАТО за колективна одбрана, потсети дека Северна Македонија секако ќе биде обврзана да го почитува. Членот пет во Повелбата на НАТО е еден од најважните столбови на Алијансата и тој предвидува дека напад врз една земја членка се смета за напад врз сите останати.
„Членот пет за колективна одбрана ќе стане обврска што произлегува од договорот, штом Северна Македонија стане полноправна членка. Ние го потпишавме пристапниот Протокол и штом сите НАТО сојузници го ратификуваат, Повелбата ќе се примени врз Северна Македонија, а членот пет ќе биде обврска“, изјави Столтенберг.
Новиот закон за одбрана со кој се зголемува усогласеноста на Северна Македонија со НАТО стандардите не може да се усвои поради тоа што нема двотретинско мнозинство. Опозицијата го спори фактот што во новиот закон се користи уставното име на земјата – Северна Македонија. Во сегашниот закон, армијата е на „Република Македонија“, но Столтенберг одби да одговори на прашањето дали тоа ќе претставува проблем за полноправното зачленување на Северна Македонија во Алијансата. Од правен аспект, ратификуваните меѓународни повелби имаат правен примат врз домашното право.