Првиот човек на НАТО Јенс Столтенберг денес во Истамбул изјави дека обидот за воен удар во Турција на 15 јули годинава е потсетување дека демократијата и слободата не можат да се земат здраво за готово и мора „енергично да бидат одбранети“. Тој зборуваше и за односите со Русија, за борбата против тероризмот и за приемот на Црна Гора во алијансата.
Столтенберг ги повика денеска членките на НАТО да го ратификуваат Протоколот за пристапување на Црна Гора во тој воен сојуз и тоа што е можно побргу.
“Ги повикувам сите држави и нивните парламенти кои досега не го ратификувале Протоколот за пристапување на Црна Гора во НАТО, тоа да го сторат”, рече Столтенберг.
Тој потсети дека следната година се одржува самит на НАТО до кога треба да биде завршена ратификација за да може Црна Гора да биде примена на тој самит за членка.
Турскиот претседател Реџеп Таип Ердоган изјави дека Анкара и е потребна светска поддршка во борбата против тероризмот, но ги обвини ЕУ и САД дека се неодлучни кога станува збор за овие терористички организации.
Според Ердоган, „терористите светот ќе го втурнат во пламен“. За да не се случи тоа, Турција треба да стане бафер-зона меѓу терористичките организации и остатокот од светот. Тој ги повика САД и другите земји повторно да го разгледаат предлогот на неговата земја за креирање на зона на слободни летови во северна Сирија.
Во однос на Русија Столтенберг изјави дека “пред руската агресија во Украина, НАТО немаше планови да испрати војници во источниот дел на нашата алијанса”. Според него, НАТО сака да спречи конфликт, а не да провоцира конфликт. Пристапот на НАТО тој го опиша како “силна одбрана, пропратена со сериозен дијалог”.
Во Истамбул се одржува парламентарното собрание на НАТО.