Социјалистичката партија на Македонија на Љубисав Иванов Ѕинго заедно со својот партнер инвеститор, фирмата „Гренадер ДООЕЛ Скопје“, денеска добија решение од Општина Карпош за времен прекин на постапка за одобрение за градба на локација во населбата Тафталиџе 1.
Се работи за објектот на стариот Дом на култура кој е во непосредна близина на ОУ „Јан Амос Коменски“.
Општинските власти денеска информираа дека прекинот за постапката е поради тоа што за оваа локација, надлежно јавно обвинителство води предистражна постапка.
Откако пред неколку месеци ги платиле комуналиите, на СПМ и „Гренадер“ им било возвратено од Општината со писмо во кое ја барале трансакциската сметка за им бидат вратени парите, но пред само два дена, инвеститорите одговориле дека не сакаат да им се вратат средствата туку сакале да градат.
Денеска, градоначлникот на Карпош, Стефан Богоев им го испратил решението за прекин на постапката, со образложение дека надлежното јавно обвинителство побарало списи од општината поради истрагата.
„Решението за прекин на постапката е поради истрагата. Додека не се донесе одлука, ние побаравме да им ги вратиме парите бидејќи не сакаме штета ниту кај нив ниту кај општината“, вели Богоев.
Горан Иванов, синот на Ѕинго лобира кај Миле Јанакиески за измени во ДУП-от
Пред измените на Деталниот урбанистички план во 2016 година, на ова место било предвидено да се гради објект со намена култура.
Но по ДУП-от донесен на Бадник 2016 година, додека градоначалник на Карпош беше Стевчо Јакимовски, се става нова маркица по што предвидено е да се гради станбен објект со седум ката и лепенка хотел со приземје и пет ката.
При објавувањето на една од бомбите кои во јавноста излегоа од СДСМ и Зоран Заев, во еден од разговорите, помеѓу Горан Иванов и поранешниот министер за транспорт и врски, Миле Јанакиески (во бомбата погрешно стои името на Емил Стојменов), се слуша како Иванов бара услуга од Јанакиески за да се направат измените за да се гради поголем објект.
СПМ и „Гренадер ДООЕЛ“ се едно исто
Фирмата „Гренадер ДООЕЛ Скопје“, која се јавува како партнер инвеститор на Социјалистичката партија на Ѕинго, е всушност во сопственост на газдата на телевизија Сител, Љубисав Иванов или во јавноста познат како Ѕинго.
Фирмата е основана во 2014 година, а како основач и сопственик во Централниот регистар на Република Македонија се јавува токму телевизијата која пред промената на власта, важеше за силен поддржувач на ВМРО-ДПМНЕ, кога лидер беше Никола Груевски.
