Повеќе од 3000 пожарникари се борат денеска со шумските пожари ширум Португалија, а оваа пиринејска држава побара помош од Европската унија за совладување на огнената стихија која се заканува да се прошири со оглед на високите температури кои метеоролозите ги најавија во наредните денови.

Службата за вонредни ситуации на Португалија соопшти дека вчера избиле 268 пожари, што е најголем број а пожари во еден ден годинава, додека 6500 пожарникари се обидуваа да ги стават под контрола, пренесува денеска агенцијата Ројтерс.

Постои страв дека многу од пожарите локализирани вчера можат повторно да пламнат денес, под влијание на попладневните силни ветрови и високи температури.

Исклучително сувото и топло време доведе до сега најголеми пожари во Португалија од почетокот на летото, при што 64 лица смртно настрадаа, а огнот повторно се распламти последните недели со доаѓањето на новиот бран на високи температури, наведува Ројтерс.

Португалската министерка за внатрешни работи, Константа Урбано де Соуса, рече дека доцна синоќа е пратено барање до ЕУ поради загриженост дека високите температури и силните ветрови би можеле наредните денови да ги зголемат пожарите.

Централната португалска област Коимбра прогласи вонредна состојба, како и четири помали области во тој регион.

Според податоците во ЕУ, повеќе од 14.000 хектари шума изгореа ова лето во Португалија, што е најмалку три пати повеќе во споредба со просечните штети од пожарите во последните десет години.