Република Северна Македонија да ги почне преговорите за членство во Европската Унија до одржување на предвремените парламентарни избори побара Мешовиот парламентарен комитет РСМ – ЕУ. Се бара од земјите членки на Унијата да се заложат и да донесат одлука за старт на преговорите најдоцна до состанокот на Советот на Унијата во март 2020 година.
На состанокот што изминатите два дена се одржуваше во Стразбур е оддадено признание на земјава за постигнатите резултати и посочени се областите каде што е потребен напредок. Истакнато е дека Европската комисија останува на својата препорака за старт на преговорите за членство бидејќи земјава ги има исполнето условите, но со забелешка дека ваквиот став „не е статичка категорија и не може да се живее на стара слава“.
Според претседателот на делегацијата на Европскиот парламент во Комитетот, Андреас Шедер, Унијата има историска улога „да им дозволи на младите генерации од Северна Македонија да станат полноправни членови на ЕУ, бидејќи една генерација е веќе загубена“.
„Нема друга алтернатива“, истакна Шедер на заседанието на Мешовитиот парламентарен комитет.
Шефот на Одделот за Северна Македонија во Директоратот за европска соседска политика и преговори за проширување, Дејвид Кулен смета дека „не треба да се измислува топла вода“, туку да се спроведат донесените закони кои се во согласност со стандардите на ЕУ, а меѓу приоритетите на Собранието треба да биде донесувањето на законот за интеграцијата на СЈО во ОЈО.
Власта во земјава останува силен поддржувач на евроинтеграциските процеси и тоа вчера на новиот комесар за соседска политика и проширување Оливер Верхеји лично му го пренел премиерот Зоран Заев.
На средбата одржана на маргините на Самитот на Централноевропската иницијатива во Рим, премиерот порачал дека земјава ќе испорача уште повеќе аргументи до Европската комисија и до сите земји членки на ЕУ, одложената позитивна одлука да дојде колку што е можно поскоро за да биде исправена грешката од Самитот на Европскиот совет во октомври.
Ваквите најави, според Верхеји, се значајни, а тој очекува и вклучување и поддршка од сите политички фактори во земјава, вклучувајќи ја и опозицијата, особено при донесувањето на законот за јавното обвинителство. Верхеји, како што вчера пренесе владината прес-служба, најавил и посета на земјава и засилен ангажман од целата Европска комисија за да се потврди определбата за забрзани перспективи за проширување и јасна економска корист за земјите и граѓаните од Западен Балкан.
Препораките на Мешовитиот парламентарен комитет усогласени по дводневниот состанок ќе бидат испратени до Европарламентот, Советот на Европската Унија и Европската комисија, како и до Собранието и Владата во земјава.