Француската полиција упати апел за помош во пронаоѓање на осомничениот за вооружениот напад на божиќниот базар во Стразбур во кој загинаа три лица, едно лице е во клиничка смрт и 12 други се повредени.
Стотици полицајци го бараат Шериф Шекат (29), од двете страни на француско-германската граница.
Осомничениот имал низа кривични пресуди и станал радикален исламист додека бил во затвор.
Полицијата вели дека е многу опасен и апелира до населението да не му се приближуваат.
Француските власти денеска објавија дека починало уште едно, трето лице како последица од нападот во Стразбур. Пет лица беа тешко ранети. Од нив, уште едно лице се наоѓа во клиничка смрт.
Шекат бил во затвор и во Германија и во Франција, а германските извештаи сугерираат дека можеби добил повик од Германија непосредно пред нападот во Стразбур. Тој не одговорил на повикот, но истражителите се обидуваа да утврдат кој стои зад него, објави РББ Инфорадио.
Министерот за внатрешни работи, Кристоф Кастанер, пред Парламентот изјави дека 720 полицајци и други припадници на безбедносните сили го бараат напаѓачот, кој е повреден во размената на оган со војници кои патролираа на божиќниот пазар во Стразбур, кога се случи нападот.
Во близина на границата, германската полиција спроведуваше претрес откако францускиот заменик министер за внатрешни работи, Лоран Нунез, призна дека напаѓачот веќе најверојатно не е во Франција.
Граничните агенти проверуваа возила што ја преминале реката Рајна, која ја обележува француско-германската граница, што доведе до долги линии на сообраќај во двете насоки.
Кастанер рече дека земјата е на највисоко ниво на опасност од напад, со што се проширени полициските овластувања и зголемена е будноста. Тој додаде дека безбедноста на сите божиќни пазари ќе биде засилена.
Француската влада и полицискиот синдикат ги повика демонстрантите од “жолтите елеци” да ги отповикаат демонстрациите планирани за сабота, за да им овозможат на властите да ја гарантираат безбедноста за божиќните празници.
Градоначалникот на Стразбур, Роланд Рис, изјави дека божикниот пазар ќе биде затворен во среда и четврток, а знамињата ќе бидат спуштени на половина копје во локалната градска сала.
Светлата на Ајфеловата кула во Париз во текот на ноќта беа исклучени во чест на жртвите од нападот во Стразбур. Градоначалникот на Париз, Ана Хидалго, рече дека гестот треба да ја покаже поддршката на градот за семејствата на жртвите и за “цел Стразбур”.