Домаќините ги пречекаа со химната на Европската унија.
Стотици луѓе попладнево се собраа на плоштадот „Клебер“ во Стразбур за да ги пречекаат српските студенти кои пред 13 дена тргнаа со велосипед од Нови Сад, како израз на протестот и барањата за правда за падот на настрешницата во српскиот град лани во ноември, во кој загинаа 16 луѓе.
На главниот плоштад е поставен црвен тепих, се веат знамиња, а насобраните носат различни транспаренти, претежно со натпис „Пумпај“. Меѓу луѓето кои излегоа да ги пречекаат српските студенти има и многу Французи, но и луѓе од целиот свет.
Околу 80 студенти кои на 3-ти април годинава со велосипед тргнаа од Нови Сад, вечерва пристигнаа во Стразбур каде што очекуваат да бидат примени во одговорните во европските институции, каде, како што велат, ќе се потрудат „светот да ја дознае вистината за Србија, институциите да реагираат и да вршат притисок врз власта, да го кренат својот глас во името на сите замолчени“.