Вардар е новиот европски ракометен првак во машка конкуренција. Дебитантот на Фајналфор турнирите во Лигата на шампиони од, можеби, аутсајдер на хартија се издигна над конкурентите во Келн и го покори континенталниот крем.
Честитки заслужуваат сите до еден во ростерот на Раул Гонзалез. Одиграа два исклучително тешки, неизвесни и резултатски тесни натпревара што беа добиени во, буквално, последната минута.
Лука Циндриќ ja расплака Барселона во полуфиналето за 26:25 за Вардар. Со голот на хрватскиот репрезентативец, по додавање од неговиот сонародник Иван Чупиќ, му беше зададен решавачкиот удар на деветкратниот европски шампион и беа избегнати продолженија.
Асистентот за победничкиот гол во полуфиналето, го постигна победничкиот во финалето за 24:23 за „црвено-црните“ и уривање на скапите ѕвезди на парискиот состав предводен од Звонимир Сердарушиќ и Штафан Олсон. По тајм-аутот на седум секунди до крајот, вардарци тргнаа во напад, Душебаев веднаш го „вработи“ Чупиќ кој ситуацијата очи во очи со голманот Омејер ја претвори во момент за историја на клубот и машкиот ракомет во Македонија.