Министерството за култура денеска соопшти дека не е избран директор на Националната установа Центар за култура „Антон Панов“ во Струмица и при повторната постапка и покрај тоа што екс директорот Васил Бубев бил единствен од пријавените кандидати кој ги исполнил условите, но не е избран бидејќи прекршил законски одредби додека раководел со институцијата.
Имајќи го предвид фактот дека кандидатките Јасмина Пијанманова и Оливера Аризанова Маннсбарт, и покрај укажувањето од Комисијата за селекција да ја достават потребната документација, тие тоа не го направиле. Поточно, едната кандидатка не доставила никаков дополнителен документ, а другата доставила сертификат кој што не соодветствува на меѓународно признатите сертификати утврдени во Законот за култура и предвидени во Јавниот оглас. Со тоа кандидатките повторно не ги исполнија условите на Јавниот оглас, стои во образложението на Министерството за култура.
Се додава дека во извештајот на Државниот Управен инспекторат било констатирано оти кандидатот Васил Бубев, во периодот додека бил директор на НУЦК „Антон Панов“-Струмица, ги прекршил член 10 од Законот за административни службеници и член 43, став 1 од Законот за вработени во јавниот сектор и затоа министерката Ирена Стефоска одлучила да не избере директор од пријавените тројца кандидати сè до распишување на нов Јавен оглас за избор на директор.
Одговорно лице на установата и понатаму останува досегашниот в.д. директор, Слободан Ѓошиќ.